" ඔබ වැනි අයෙක් අප සුරලොවට පැමිණීම ඉතාමත් අමුතු සිදුවීමක්. ඉන්න මම ඔබේ ඉතිහාසය පරීක්ෂා කරනතුරු." යි පැවසූ සක්දෙව් රජු නීතීඥ තෙමේ මිනිස් ලොව සිටියදී කරන ලද යහපත් ක්රියා පිළිබඳ වාර්තාවක් ගෙන ඔහු හමුවේ කියවන්නට විය.
"ඔබ ජීවිතයේ අවස්ථා 2කදී යහපත් ක්රියාවන් කරලා තිබෙනවා. එක්වරක් සපත්තු මහන අයෙක්ට අමතර රුපියල් පහක් දීලා තීයෙනවා. ඒ වගේම හිඟා කමින් පසු වූ අයෙකුට රුපියල් 2ක් දීලා තියෙනවා"
මදහසක් මුවට නගා ගත් නීතීඥ තැන "ඔව් ස්වාමීනී, මම විශ්වාස කරනවා මම සුරලොවට පැමිණීමට ඒ කරන ලද පුණ්ය මහිමය හේතු සාධක වූ බවට." යැයි පැවසුවේය.
"හ්ම්ම්... ඔහොම ඉන්න ඔබේ පාපකාරී ක්රියාවන් ගැන වාර්තාවන් ඉදිරිපත් කරන තුරු" සක්දෙවියෝ කල්පනාකාරීව පැවසූහ.
"1. ඔබ වැරදිකරුවන් යැයි නිසැකවම දන්නා මිනීමරුවන් රැසක් ඔවුන්ගෙන ලැබුණු අධික මුදල් සම්භාරයට තෘෂ්ණාවෙන් නිදහස් කරදී තිබෙනවා.
2 ඔබ ඔබේ සේවාදායකයන්ගෙන් ඉතාමත් අධික මුදලක් අයකරගෙන තිබෙනවා.
3. බලවත් දේශපාලකයන්ගෙන් අහිංසක සාමාන්ය ජනයාට සිදුවූ අසාධාරණකම් වලදී නීතීයේ පිහිට එම බලවතුන්ට ලබා දී ඔවුන් බේරාගෙන තිබෙනවා.
4. ඔබගෙන් නීති උපදෙස් පතා ආ කාන්තාවන් රැසැක්ම බියගන්වා ඔවුන්ගෙන් අයුතු ප්රයෝජන ලබාගෙන තිබෙනවා. "
" මේ චෝදනා ගැන ඔබට මොකද්ද කියන්න තිබෙන්නේ"?
සිය සුපුරුදු මදහසම මුවට නංවාගත් නීතීඥ තෙමේ මෙලෙස පවසන්නට විය.
" ස්වාමීනී, මා එම චෝදනාවට විරුද්ධත්වය ප්රකාශ කරනවා. මම ඉතාමත් වගකීමෙන් කියනවා ඔය කියන කිසිම දෙයක් මට මතක නැතිවග. ඔබට උවමනා නම් මට දින 2ක කාලයක් සහ ඔය කියන අගතියට පත් වූ පාර්ශයන් ගැන තොරතුරු ලබා දෙන්න. මා ඔවුන්ගෙන් දිවුරුම් ප්රකාශ ලබාගෙන ඔබට ඔප්පු කරන්නම් මා ඔය කියන කිසි දෙයක් නොකළ වගට"
තමා පසෙකින් සිටි මාතලී දිව්යපුත්රයා දෙසට හැරුණු සක් දෙවියෝ නිවුණු ස්වරයෙන් ඔහුට මෙසේ පැවසූහ.
" මා ප්රිය මාතලී, මෙන්න මේ තැනැත්තාට අර කරපු යහපත් ක්රියාවන්ට හරියන්න රුපියක් දහයක්ම දීලා වහාම අපායට ගිහින් දාන්න."
ප. ලි. - කෙලින්ම අදාළ නොවුණත් බලය ඇති තැන් වල සිටින ඇතැම් පුද්ගලයන්ගේ අතීත ක්රියා සහ වර්තමානය මෙන්ම අනාගතය ගැන කල්පනා කරද්දි The Dark Knight චිත්රපටයේ එන එක් කියමනක් මතකයට ආවා.
"You either die a hero or you live long enough to see yourself become the villain."
