නියම අපවාදය

තමන් විවිධ මාර්ගඵල ලබා ගත් බව සඳහන් කරමින් මාධ්‍ය ඉදිරියේ පෙනී සිටින පුද්ගලයන් කාලයෙන් කාලයට මතු වෙනවා.  ඒ ගැන මගේ අදහස නම් එවන් මත පිළිබඳ කතා කිරීමට අපට සුදුසුකම් නැති බවයි. නමුත් වංචාවක් සිදු වේ නම් ඒ ගැන නිවැරදි ක්‍රියාමාර්ග වහාම ගත යුතුයි. නැතිනම් එවන් අයට ‍රැවටෙන පුද්ගලයන්ට සිදුවන හානිය අතිවිශාලයි. මේ සියලු සිදුවීම තම තම නැණ පමණින් දැන ගත යුතු දෑ විදියටයි මම සලකන්නේ. තමන් නිවැරදිව ධර්මය හදාරා තිබෙනවා නම් නිවැරදී දේ ‍තෝරා බේරා ගන්නට තමන්ටම හැකිවිය යුතුයි.

ඔය අතරෙදි මට මතක් වුණා මම කියවලා තිබුණ පරණ කතන්දරයක්.

එක විල්තෙරක පිහිටලා තිබුණ පන්සලක ජපන් ජාතික තරුණ හාමුදුරුනමක් වැඩ සිටියා. මේ විල මැද්දෙ සෑහෙන ගොඩබිමට නොපෙනෙන දුරින් තරමක් විශාල දූපතක් තිබුණා. තරුණ හාමුදුරුවො තීරණය කරා තමන් මේ කලබලකාරී ලෝකයෙන් මිදිලා නිවන් අවබෝධ කරගන්න කටයුතු කළ යුතු බවට. එහෙම හිතපු උන්වහන්සේ වැඩි දුරටත් අධිෂ්ඨානය කරගත්තා ඒ නිවන් අවබෝධ කරගැනීම තරුණ වියේදීම ඉ‍ටුකරගත යුතු බව. ඉන්පසු තමන්වහන්සේට ලෝ සතහට සෙත සදමින් දිගුකලක් කටයුතු කිරීමට හැකිවන බව උන්වහන්සේ හිතුවා. අවසානයේදී සිය ගුරු හාමුදුරුවන්ගෙන් අවසර ලබා ගත්ත තරුණ හිමිනම විල මැද්දෙ තිබුණ දූපතට වැඩම කරලා කුඩා කුටියක් තනාගෙන භාවනා කරන්න පටන් ගත්තා. උන්වහන්සේට අවශ්‍ය අහාර පානාදිය ‍රැගෙන සතියකට වරක් කෙනෙක් එවන්නත් කටයුතු සූදානම් කළා.

ටිකෙන් ටික කාලය ගෙවුණා තරුණ හිමිනම වීර්යයෙන් සිය උතුම් අරමුණ සාක්ෂාත් කරගැනීමට වෙහෙස වුණා. එතුමා සතියකට වරක් ආහාර රගෙන එන තැනැත්තා සමඟවත් කතාබහ කළේ නැහැ. සම්පූර්ණයෙන්ම හුදෙකලාව කාලය ගත කිරීමට උන්වහන්සේ තීරණය කර තිබුණා.  මෙලෙස වසර 3ක්ම ගෙවුණා. තමන් වහන්සේ  තම අරමුණට ළඟා වී ඇති බව අවසානයෙදී තරුණ හිමිනම අවබෝධ කරගත්තා. එතුමා තීරණය කළා මේ පුවත සිය පන්සලේ නායක හිමියන්ට දන්වන්න. ඒ අනුව ඊළඟට අහාර ‍රැගෙන ආවතේවකරු පැමිණි දිනයේ උන්වහන්සේ දැන්වූවා උසස් තත්වයේ කඩදාසියක් සහ තීන්ත සහ පෑනක් ලබන වතාවේ ‍රැගෙන එන ලෙස. ඊළඟ දින කිහිපය භාවනා කරමින් සහ සිය උත්සාහයෙන් අවබෝධ කරගත් උතුම් තත්වය නායක හිමියන්ට දන්වන අයුරු කල්පනා කරමින් උන්වහන්සේ ගතකළා. ඊළඟ දින කඩදාසිය හා අවශ්‍ය දෑ ‍රැගෙන ආවතේවකරු පැමිණි පසු උන්වහන්සේ ඔහු අත ඉතා ප්‍රවේශමෙන් සහ  වටිනා අත් අකුරින් මෙලෙස ලියා යැව්වා.

පුරා තුන්වසක් තනිව බවුන් වැඩූ

තියුණු අනලස් තරුණ හිමිනම

ලෞකික මාරුත සතර මඟින්

තවත් නම් සෙලවිය නොහේ

ලිපිය යැවීමෙන් අනතුරුව උන්වහන්සේ මහත් ප්‍රීතියෙන් කල්ගත කළා. සිය නායක හිමියන් ලිපිය කියවා උද්දාමයට පත්වන අයුරු, දායකාදීන්ට පවසා තමන්වහන්සේ ගෞරව සම්ප්‍රයුක්තව වඩම්මවන අයුරු, මුළු මහත් දේශය පුරා තමන් වහන්සේ කරන්නට යන ධර්ම ප්‍රචාරය කරන අයුරු උන්වහන්සේ මෙනෙහි කරමින් පසුවුණා. නිසැකවම ඒ වටිනා ලිපිය පරම්පරා ගණනක සත්‍ය ගවේෂකයන්ට අත්පොතක් වේවි.

ආවතේවකරු  ඊළඟ දිනයේ දූපතට පැමිණෙන විට තරුණ හිමිනම තො‍ටුපළට වැඩම කර සිටියා. ඔහු හිමිනම පෙර යැවූ  ලිපිය බඳු ලිපියක් බාරදුන්නා. නමුත් එය නිකම්ම නූල්පටකින් බැඳ තිබුණා. එය දු‍ටු තරුණ හිමිනමට අමුත්තක් දැනුණා. "මේ ලොකු හාමුදුරුවන්ගෙන්" ආවතේවකරු කෙටියෙන් කියා දැම්මා. අප හිමියන් වහාම ලිපිය දිග ඇරියා ඒ ඔහුගේම ලිපියයි. නමුත් කියවන විට උන්වහන්සේගේ නෙත් විශාල වුණා. මාහැඟි අත් අකුරින් ලියූ කවියේ හැම පේළියකම අගට නායක හිමියන්ගේ අත් අකුරින් නිකම්ම රතු පැහැති පෑනකින් "අධෝවාතය" යනුවෙන් නොසැලකිල්ලෙන් කුරු‍ටු ගා තිබුණා.

තරුණ හිමිනම දැඩි ලෙස කළකිරුණා. මේ නම් වයස්ගත නායක හිමියන්ගේ ඊර්ෂ්‍යා සහගත නොමනා ක්‍රියාවක්. තමන් ලද උතුම් තත්වය දරා ගත නොහැකිව කරපු අපවාදයක්. පරම සත්‍යය වෙත කරපු නිග්‍රහයක්. කෝපයෙන් දිදුලමින් උන්වහන්සේ ආවතේවකරු සමඟ බෝට්‍ටුවට නැඟී විල්තෙර පන්සලට වැඩම කළා. මේ උන්වහන්සේ වසර තුනකට පසු  ගොඩබිමට ආ පළමු වතාවයි. ගොඩට ආ වහාම උන්වහන්සේ සිය නායක හිමියන් වෙත වේගවත් ගමනින් වැඩම කළා. වියරුවෙන් මෙන් නායක හිමියන් බැහැදු‍ටු තරුණ හිමිනම ලිපිය දිගු කොට වහාම පැහැදිලි කිරීමක් ඉල්ලා සිටියා. සන්සුන් විලාසයෙන් ලිපිය අතට ගත් නායක හිමියන් එය දිගහැරියා.

පුරා තුන්වසක් තනිව බවුන්  වැඩූ

තියුණු අනලස් තරුණ     හිමිනම

ලෞකික මාරුත සතර      මඟින්

තවත් නම් සෙලවිය      නොහේ

ලියවිල්ල පහත දැමූ නායක හිමියන් තරුණ හිමියන්ගේ මුහුණ දෙස බලා මෙසේ වදාළා."එහෙනම් පොඩි හාමුදුරුවනේ, ලෞකික සුළං හතරට නොසෙල්විය හැකි ඔබවහන්සේ පුංචි අධෝවාත 4කින් මෙගොඩටම ගසාගෙන ආවා නේද?"

මූලාශ්‍ර - ඔබේ හදවතේ දොර විවර කිරීම - පූජ්‍ය අජාන් බ්‍රහ්මවංසෝ හිමි