රාවනා රජතුමනි ඔබතුමා ආපසු එනවාද?

රාමායනෙන් ඔබේ චරිතය වාල්මිකී  පතුරු ගැහුවා අපි දන්නවා. වාල්මිකී අපේ හතුරෙක්. දේශපාලන සතුරු චරිත ඝාතනය ගැන හමුවෙන පරණම උදාහරණය තමයි ඒ. ලොවම ගරු කළ රාවනා නාමය විනාශ කරන්න එදා ඉන්දියානුවන් තමන්ගේ ආගමටත් රාමායන පුවත ඈඳාගත්තා.අදටත් එය සැමරීම ඔවුන්ගේ සිරිතයි. 


ඒවායින් කමක් නෑ. නමුත් අපේ උදවිය දැන් කොරන වැඩ දැක්කාම ඔබතුමාට ආපහු එන්න හිතෙනවාද? ඔවුන් කියනවා රාමාගේ හීපහරින් මුසපත් වුණ රාවනා රජුගේ දේහය ගල් ගුහාවක තැන්පත් කර තිබෙනවාලු. මහා යාතිකර්ම ගණනක් කරාට පස්සේ පණ එනවාලු. තවත් තැනක සඳහන් වෙලා තිබුනා විශ්වයේ තිබෙන රාවනා ශක්තිය හෙළයේ සතුරන්ට විරුද්ධව ක්‍රියා කරනවාලු. රාමායණයෙන් විතරක් නෙවෙයි සිංහලයන් පවා ඔබතුමා ගැන මිත්‍යාව වපුරනවා. රාවන ශ්‍රී නාමය අද වනවිට ඉතා වටිනා වෙළඳ නාමයක් වෙලා! ඔබතුමාගේ නමින් හෙළ අංගම් පොර කලාවත් විකුණන්න දැන් ඇතැමුන් හරි දක්ෂයි.




ඇයි අපිට හිතන්න බැරි ඔබතුමා සටන නැවැත්තුවේ ඒ මහා මනුෂ්‍ය ඝාතනය දරා ගන්න බැරුව කියලා? වෛද්‍යවරයෙක් වෙච්ච ඔබතුමා මිනිසුන් මැරීම පිළිකුල් කළ බව. සුරා පානය කරන්නන් හෙවත් සුරයන් සියල්ලම එකතුවෙලා අසුරයන් වෙච්ච හෙළයන්ට විරුද්ධව සන්ධාන ගත වෙච්ච මොහොතක තමන්ගේ සොහොයුරු විභීෂණත් සහය දෙනවා නම් තව දුරටත් සටනේ යෙදීමෙන් සිදුවන්නේ හෙළ පරපුරේ වටිනා මිනිස් ජීවිත විනාශය පමණක් බව වටහා ගත්ත ඔබතුමා  සටන අත්හළ බව.? විභීෂණගේ ඉලක්කය හෙළය නැසීම නොව තමන් හා වන පෞද්ගලික වෛරය පිරිමසා ගැනීම පමණක් බව තේරුම් ගෙන රජකම අතහළ  ඔබතුමාගේ සද්කාර්යයන් ඉදිරියටම ගෙන ගිය වග? රාවනා රජු යනු හෙළ යුගයේ අවසානය නොව එකළ හෙළයන් විනාශවීම වළකා එයින් වසර දහස් ගණනකට පසු යක්, නා, රකුස්  ජනතාව එක් වී නව සිංහල ජාතිය තනන්නට මඟ පාදා දුන් විරුවෙක් බව?


මිත්‍යාවට එරෙහිව තවත් මිත්‍යාව පැතිරවීමෙන් යහපතක් වේවිද?



විමසුමට විවෘතයි!

ප.ලි - අන්තර්ජාලයේ පළවූ රාවන යුගය ගැන ලිපි වැඩිදුර කියවීමට හෙළ යුගය වෙත පිවිසෙන්න.